Ek het jare terug in ‘n boek gelees dat dit vir meeste mense onmoontlik is om in ‘grys’ te dink. Dit is ‘swart’, of ‘wit’. Met ander woorde, jy kan nie vir mense of dinge 7,6/10 gee nie, jy neig na 0/10, of 10/10, veral na ‘n verloop van tyd. Dit is presies hieroor dat dooie mense altyd perfek was. Selfs die negatiewe goed word goeie goed – “Jis maar Oupa kon vir jou ‘n bottel brandewyn kap, en hoe goed was sy linker ‘jab’ as hy gesuip was, of hoe Ouma?”. Ek wens ek kan onthou wat die boek se naam is, ek dink dit kan ‘Tipping point’ wees.

Ek het sedertdien al meer en meer agtergekom hoe waar dit is. Die ding met Eugene Terre’Blanche is ‘n goeie voorbeeld, en daar is honderde ander voorbeelde. Die grys manier van dink sou iets wees in die lyn van: ‘Eugene Terre’Blanche was ‘n intelligente man en goeie spreker, maar hy het vreemde idees gehad oor ras en politiek, en hy het baie min beheer gehad oor sy humeur’. Die ‘swart en wit’ manier van dink, kan dit nie doen nie. Meeste mense dink so: “Eugene was ‘n intelligente man en goeie spreker, dus stem ek saam met sy idees oor ras en politiek, en daai fokken petroljoggie het gekry wat hom toekom” of “Eugene het vreemde idees oor politiek en ras gehad en kon nie sy humeur beheer nie, so die fokken rassis het verdien om vermoor te word”.

Dit is natuurlik ‘n hartseer stand van sake, want die feit dat meeste van ons nie twee idees oor een ding in gedagte kan hou nie, maak ons baie maklik slagoffers van politikusse en ander gewetenlose fokkers.

Nog voorbeelde van hoe jy deur die ore gewerk word:

1. Ek haat Julius Malema. Helen Zille haat Julius Malema. Helen Zille is great. As Helen sê ek moet my onderlip oor my kop trek en myself versmoor, is dit ‘n moerse goeie idee. (Wat van: Helen is ‘n mislike ou bitch, maar ek laaik haar gedagtes oor Malema?

2. Bryan Habana is ‘n great rugbyspeler. Hy is dus ook ‘n wonderlike mens en kanse is goed hy is ook ‘n boffin as dit by persoonlike higiëne kom.  As hy sê Protex seep is die beste ding ooit, dan moet dit wees. (Wat van: Bryan is ‘n wonderlike rugbyspeler, maar ek gaan aanhou seep probeer tot ek ‘n lekker een kry)

3. My eerste Volkswagen was ‘n lekker kar, behalwe vir die petrolpomp wat gekak het, die feit dat jy deur die passasiers kant moes inklim omdat die ander deure nie gewerk het nie, en hoe jy die clutch 3 keer moes pomp voor jy 3de rat kon kry (ek dink net in swart en wit, so ek moet besluit, of kak of great, so in plaas van 5,5 punte uit 10, gee ek hom of 0, of 10). Dit volg natuurlik dat alle Volkswagens goeie karre is, maak nie saak wat HelloPeter sê nie.

Nou ja, soos ek gesê het, meeste mense kan dit nie doen nie. Moenie sleg voel as jy een van hulle is nie. Mense gaan jou manipuleer, en ‘n klomp kak aan jou verkoop, en jy sal meer gereeld jou moer pluk vir goed, maar jy is ten minste nie alleen nie.

Krokodille is van die suksesvolste, indien nie die suksesvolste, ontwerpe wat die aarde nog gesien het. Wetenskaplikes glo dat hulle ongeveer 200 miljoen jaar oud kan wees as ‘n spesie. Dinosourusse het ongeveer 65 miljoen jaar gelede uitgesterf. So wat ookal die duisende ander spesies laat uitsterf het, het omtrent geen effek gehad op krokodille nie. As jy glo die aarde is net 4700 jaar oud en dat fossiele geplant is om ons vir ‘n slappe te vang – jammer, hou maar op lees. Ek bedoel dit, moenie enigiets lees nie, veral nie ‘n ensiklopedie nie.

Een van hulle voordele is dat hulle koudbloedig is. Hulle kan maande lank sonder kos gaan, omdat hulle metabolisme stadiger kan word soos temperature laer word.

Die rede vir die kakkerige biologie les, is omdat ek aan iets gedink het. Sjimpansees is baie slimmer as krokodille. Hulle het duime, hulle kan eenvoudige werktuie gebruik, soos stokkies om termiete te vang of klippe om neute te kraak, maar hulle is wêreldwyd bedreig. Krokodille is stadiger, dommer en leliker, maar as ‘n spesie meer suksesvol.

Hier is, uit-bliksems-eindelik, die punt: Moet jy jou kop laag hou, en spaarsamig wees met wat jy het en die lewe oorleef, of moet jy jou kop hoog hou, kanse vat en die lewe leef? Sou jy eerder ‘n krokodil of ‘n sjimpansee wees?

Sjimpansees het meer pret, speel met hulle kinders, hulle het seks net vir die pret daarvan, en hulle het ook iets soos ‘n ‘ouma’ in hulle sosiale struktuur.

Ek sê fok ‘suksesvol’ ek wil ‘n aap wees!

Nog foto’s hier.

Hier is ‘n hartseer storie van nog iemand wat geskiet is vir sy foon. Een uiterse kak ding wat gebeur as jy iets hoor wat soveel suig, is dat jy graag minder kak wil voel deur so bietjie skuld op die slagoffer te wil plaas. Almal doen dit, dit is ‘n leuen wat jy jouself vertel om minder sleg te voel oor die ding. As jy byvoorbeeld verby ‘n kar ongeluk ry, wil jy graag dink – ‘maar hulle het te bliksems vinnig gery’, of as iemand geskiet is vir ‘n foon wil jy graag dink – ‘hy het seker terug baklei of iets’. Dit is maar normale menslike gedrag, en normale menslike gedrag is maar gewoonlik onnosel. Dit is hoekom dit mens so verskriklik pla as iets met ‘n kind of hond gebeur, want wat kon die kind of hond nou gedoen het wat die hele ding so bietjie meer aanvaarbaar kan maak? En as jy nie aan iets kan dink nie, raak jy EERS die bliksem in vir die persoon wat dit gedoen het.

In die storie wat ek hierbo na verwys, is een van daai goed wat my nog so bietjie klein kry, my gat se deksel met ander woorde. Die ou se ma sê hy is geskiet vir niks nie want hulle het dan sy 4×4 Mercedes gelos, en dit maak volgens haar die hele ding so bietjie erger. Is dit regtig beter om vir jou 4×4 geskiet te word as vir ‘n selfoon of absoluut niks nie? Volgens my is die ou wat hom geskiet het net so groot fokker of hy dit vir die selfoon of die Mercedes gedoen het.

Ek hoop daar is ‘n spesiale hel vir die ouens wat die tipe goed doen, of dit nou vir ‘n selfoon of ‘n kar of watookal was. Ek hoop hulle moet sonder ooglede, vasgebind in ‘n stoel sit in ‘n kamer met die lugversorging op 1000 grade gestel, en die selfde reeks van Idols oor en oor kyk waar die deelnemers net Eden liedjies mag sing, “Honky tonk, my ou skedonk, ek’s ‘n mechanic maar ek gaan jou fonk” tot in die lengte van dae, fokkers!

Ek staan nou die dag en urineer by een van daai porselein lelies in ‘n publieke toilet, en sien toe een van daai advertensies wat hulle oral opsit in die kleties. Ek hou eintlik van die advertensies, want vir een of ander rede voel die advertensie agentskappe hulle moet meer grappig, oorspronklik en so bietjie gewaagd wees omdat dit in toilette is of iets.

In elk geval, die advertensie is toe ‘n histeriese waarskuwing teen ‘n dodelike siekte wat enigiemand kan kry. Duisende mense sterf daagliks daarvan en jy beter nou iets daaraan doen anders maak jy dit dalk nie uit die toilette uit nie. En die siekte is GRIEP!!

Dit is iets wat my nou al lank verskriklik pla, dat mense paniek saai net om hulle produk te verkoop.

Anti-Bacterial seep is nog ‘n groot een. Die advertensies het dramatiese musiek en weerlig as die ma aan haar kind vat met ‘besmette’ hande. “BEL DIE KINDERBESKERMINGS EENHEID!! Daai nalatige bitch het nou net haar kind se LEWE in gevaar gestel want sy het aan hom GEVAT nadat sy SKOTTELGOED GEWAS het!”

My hoogs ingeligte en beskeie opinie is: “Aaag kak man!”, ek het deur dosyne griepe en verkoues geleef. As my hande vuil is , dan was ek hulle, met seep. Ek kan nie eers onthou wanneer laas ek eers ligte gietergat gehad het nie. Daar is wel ‘n paar wetenskaplikes, wat natuurlik nie gehoor word in die histeriese gegil nie, wat glo dat ons Super Kieme kweek deur net die hardegatste, blou-bebaarde kieme te laat oorleef deur al hulle kompetiese uit te vat met die anti-bakteriële sepe wat ons gebruik.

Die groot ontsteltenis is dat ek nou so skepties is oor enige nuwe histeriese kwessie waaruit iemand kan geld maak, dat ek nou al begin wonder of aardverwarming nie ook ‘n groot klomp kak is nie. Elke battery vervaardiger en sonverhitting verkoper maak die pap so bietjie dikker aan, nie omdat hulle ‘n dooie donder omgee vir die planeet nie, maar omdat hulle dalk so ietsie kan verkoop aan paniekerige, skuldbelaaide verbruikers.

Die bliksems.

Ek het lank terug ‘n kamer met so paar ouens van Carltonville af gedeel(Dit is ‘n lang storie). As daai ouens ‘n goeie maatstaf was vir die res van Carltonville, is Carltonville die Skurf hoofstad van Suid Afrika. Daai ouens was MOER skurf. ‘n Goeie voorbeeld van hoe skurf hulle was, is toe Jan, wat altyd met sy een hand in sy kortbroek rondgeloop het, met so vêr-weg kyk in sy oë, vir niemand spesifiek nie, gesê het “Juslaaik, ‘n tos sal nou lekker afgan”.

By daai Carltonville ouens het ek die eerste keer die woord ‘skrop’ gehoor. Soos “Toe skrop ek haar en haar ma sommer die selfde aand” (Daai sin was regtig gebruik).

Wat my laat dink het ‘Skrop’ is net as twee skurwe mense seks het, of die meisie is nog nie 16 nie, of ‘n ander onsedelikheid.

‘n Ander gunsteling is ‘Naai’. Mooi mense kan nie naai nie. Lelike ouens, in adidas sweetpakke (die oues met die strepies langs die kante, in rooi, of blou) met bles koppe, snorre en aviator brille………hulle kan ‘naai’.

Spyker het ‘n besliste stoute element aan hom. Jy spyker nie jou vrou van 15 jaar nie. Julle ‘Maak Liefde’ of ‘Verkeer Intiem’, nee, ‘Spyker’ word gereserveer vir girlfriends en ‘one night stands’.

‘Raps’ het ook so stoute gevoel aan hom, maar jy kan jou vrou raps. Dit is dan so skelm enetjie in aantrek kamers of iets.

Daar is dan natuurlik ‘steek’, ‘sweis’, ‘pangelang’ en nog ‘n klomp ander.

‘n Ander een wat die laaities op koshuis gebruik het was ‘Hollie’. Soos in “Fanie sê Sean is ‘n moffie en dat hy vir Gysie ge-hollie het agter die fietsloots”. ‘Hollie’ klink eintlik heel onskuldig en pret. Soos ‘Hollie die Nar’ of ‘Hollie die vriendelike Hamster’ of so iets.

Ek het lank terug gehoor dat hoe belangriker iets is in ‘n kultuur, hoe meer woorde is daar vir daardie ding. Dink net aan al die name vir masturbeer(skommel, draadtrek, tos, kierie kap, jou dolfyn waks…….) en al die name vir ‘n drankie (knertsie, dop, lange, lang koue een, ietsie kouds, brannas ens) en ook al die name vir borste (boobs, tiete, kanne, pramme, lelle, moemfies….).

Hoekom is dit net mans wat met hierdie kak opkom? Ek weet nie van vrouens wat soveel name het vir goed nie.