Snaaksgenoeg

Ek sit nou die dag op die troon en lees een van my vrou se tydskrifte – my selfoon se battery was pap – en ek sien toe ‘n artikel wat my vaagweg interesseer, maar ek soek net die sinnetjie wat my vraag antwoord. Daar was so breukdeel van ‘n sekonde waar ek “Ctrl F” wou druk om die sleutelwoord te soek.

Dit was waar ek besef het ek spandeer te veel bliksemse tyd op die internet.

Daar is ‘n albino koerantverkoper so 3km van my huis af by wie ek elke oggend verby ry. Ek kry die arme mens so bliksems jammer! Kan jy aan ‘n kakker beroep dink vir iemand wat albinisme het as om heeldag in die son te staan en koerante verkoop? Dit is seker net “Sonbed Toets Tegnikus” wat moontlik erger kan wees. Koop mense nog koerante? Ek lees maar al my nuus op die internet. Jy kan sommer ‘n ‘Google alert’ skep as jy een nuus sage wil dophou, dan kom die nuus sommer na jou toe – gratis. Die ou spook so by my dat ek nou die dag sommer R10 betaal het vir my koerant in plaas van die skamele R4.50, sodat die bediende iets het om die ruite mee skoon te maak.

Miskien moet ek tog die koerant weer ‘n kans gee? Dit sal my forseer om bietjie vir ‘n paar minute rustig te sit en fokus in plaas daarvan om soos ‘n Ritalin kandidaat vyf nuwe ‘tabs’ oop te maak in Firefox en so vlugtig oor die goed te skandeer soos ‘n stout skoolseun wat vergeet het om te leer vir die Biologie toets.

PS: My pa het, toe ek nog ‘n skool laaitie was, ons bediende oortuig dat hy glo ons oorkantste bure het ‘n wit ou wat in hulle tuin werk. “Ek sien die Du Plessis’ maak baie geld Martha. Hulle het ‘n mlungu wat in die tuin werk! Hoeveel dink jy is dit om ‘n mlungu te kry vir die tuin? Ek dink dit is baie” sou my pa vir haar sê. “HAU! Hy is nie die mlungu nie baas! Hy is die albino!” was Martha se verontwaardigde antwoord, elke blerrie keer.

Aai die dae toe 'n bier net so maklik was om oop te maak as 'n blik olie!

So ruk terug het dit onder my aandag gekom dat daar mense is wat glo “nuwer is beter”. Hoe kan jy aan so ooglopend verkeerde idee klou? Ja, ek stem saam, dit is waar met baie dinge. Ek onthou die eerste 1 megapixel kamera – die foto’s was so kak dat jy met die grootste graagte pornografie kon versprei op hom. “Sies, waar druk sy haar elmboog, is dit nie seer EN onmoontlik nie? O, wag ek sien, dit is ‘n kussing wat daar agter uitsteek”. Die nuwe iPhone is seker beter as die een voor hom, en, nee, ek wil nie sien hoe oulik die katjie naar word as jy die foon skud nie, en ek stel nie belang hoe ek sou lyk as ek ‘n 70 jarige swart man was nie.

Baie dinge is deesdae kakker. Karre word deesdae gebou om weggegooi te word as jy klaar is. Mense word amper ‘n kwart van ‘n kar se prys gekwoteer om ‘n turbo te vervang. Niemand gaan ‘n ’03 Kia Picanto liefdevol restoureer nie, hy gaan ashoop toe. Ons laai liedjies een een af op ons selfone in uiters kak gehalte en kry nooit die kans om daardie versteekte ‘classics’ op kant B te luister nie. Van daai B-kant liedjies maak my nou nog hartseer/verlief/verlore/kwaad/opgewonde voel, maar hulle word sommer nie eers geskryf deesdae nie. Elke bliksemse liedjie moet ‘n irriterende ‘hook’ hê wat aanhoudend herhaal sodat mense hom tog net dadelik download vir R15 en nie net aflaai van hulle tjommies se fone af nie. Terloops, hoe de donder kan iemand wat al ‘n jaar lank sing ‘n ‘Best of’ album uitbring? Die slaafse navolging van gerieflikheid gaan ons nog duur te staan kom. Dit voel of daar soveel minder ervarings is deesdae. Die verskeidenheid stront wat ons moet of wil doen word minder, tog is ons meer besig as ooit tevore.

Nou klink ek dalk soos iemand wat glo in die ‘goeie ou dae’. Dit is net so hoop stomende stoelgang. Ek het laas week gehoor van ‘n dominee wat homself en sy hele gemeente so 35 jaar terug in die skande gesteek het, en deur sommige ouderlinge gevra is om te loop, nadat hy soos iemand wat deur bose geeste beset is, op ‘n Sondag geswem het! Hy het sy walglike sedeloosheid probeer verdoesel deur dit in die nag te doen, maar ‘n oplettende diaken het die gedrag gewaar en die regte ding gedoen!

As jy 15 jaar gelede verveeld was op ‘n Sondag middag moes jy gaan slaap, want daar was fokkol op TV nie, en net ‘n hospitaal was oop op ‘n Sondag want hulle was kwytgeskeld van die hel omdat hulle mense genees.

Ek glo vas dit was nog altyd net so kak, en net so lekker soos dit nou is. Die lewe het so manier om homself uit te balanseer. Ja, ‘n inboorling in ‘n reënwoud moet dalk elke dag veg om oorlewing, terwyl hy probeer onthou om nooit, ooit te suig aan ‘n blaaspyp met ‘n gifpyl in nie en watter paddas is nou weer lekker om te braai en watter se gif kan 200 mense dood maak in 20 minute, MAAR hy weet nie eers wie is Steve Hofmeyr nie!

Ek sou baie graag wou weet hoeveel bedelaars wat skryf dat hulle vir werk soek, regtig soek vir werk. Dit sou interessant wees om hulle verskeie posisies aan te bied en te sien of hulle enige van die werke aanvaar. Sou jou gemiddelde ou byvoorbeeld gaan vir ‘n tuin werk of sou hy eers val boereworsrolletjie  verkoper. Om eerlik te wees, ek glo 99% van hulle stel regtig nie belang in werk nie, en sodra hulle uitwerk dat 10 ure in ‘n bakkende son en marineer in uitlaatgasse eintlik kakker as ‘n werk is, gaan hulle heeltemal ophou om enigiets te doen. Ken enige van julle iemand wat by ‘n robot staan? Ken jy dalk iemand wat iemand ken wat by ‘n robot bedel? Ek het so verlangse konneksie met karwagte – ‘n eks-aangenome kind van my suster se biologiese pa se familie (ek besef dit klink soos ‘n sepie en daar kort net geheueverlies voor ek dit dalk kan verkoop as draaiboek). Ek is BAIE nuuskierig!