Nog ‘n onbeantwoorde brief aan die goeie dokter.

Liewe Dr. Platzhund,

My hond kak ontsaglik baie. Ek het, op ‘n vermoede wat ek gehad het, al my hond se stront opgetel en in ‘n sak gehou vir ‘n maand. Ek het die sak toe vergelyk met die sak hondekos wat ek hom gegee het.

Die interessante ding is dat ek 12kg se stront opgetel het waar die hond slegs ‘n 7.5kg sak kos opgeëet het.

Hoe is dit moontlik? Selfs al las ek 2kg se skoene, speelgoed en gras by, kom ek nie naby die 12kg stront in die sak nie.

Sluip my hond ongesiens in die aand uit en gaan eet êrens anders? Is dit dalk my buurman wat kos oor die heining gooi? As hy honde gehad het, het ek dalk vermoed dat hy stront oor my heining gooi maar hy het nie honde nie.

Is daar ‘n manier wat my hond se derms ‘n ‘deur’ na ‘n ander dimensie oopgemaak het en stront van daar af in bring na ons dimensie?

Kan dit wees dat Pugs stuifmeel en ander stowwe in die lug opneem deur hulle monde en neuse, dit verbruik en dan as stront uitskei?

Weereens sal ek ‘n antwoord van u waardeer,

Groetnis,

Worsbeursie.

Dr. Platzhund ignoreer nou al lank my brief en ek wil dit graag deel met die res van julle Waddefokkers.

Liewe Dr. Platzhund,

My hond (‘n 8 maand oue Pug) blaf vir my as ek op die kakhuis sit. As ek alleen hier by die huis is dan skuit ek sommer met die deur oop. As ek die deur toe hou dan snuffel snuffel snork die hond onder by die skrefie en die geluid maak my mal. Nou het ek begin om met die deur oop op die porselein troon te sit, maar dit laaik die Pug net mooi fokol. Hy begin knor en as ek hom nie wegjaag nie begin hy vir my blaf.

Ek het vermoed dat dit die reuk is wat hom ontstel tot ek onthou het een van sy gunsteling tydverdrywe is om my ander hond se poephol te ruik en oor die algemeen te inspekteer. Dit kan onmoontlik nie dit wees nie. Ek het hom al met ‘n baba doek gevang en dit was nie iets wat ek weer wil sien of met Dokter wil deel nie.

Kan dit my gesigsuitdrukking wees? Ek twyfel want ek het met my selfoon ‘n foto geneem in volle ‘gang’ toe ek daaroor begin wonder het en ek lyk vir myself heel normaal.

Kan dit wees dat hy my wil oorreed om ook buite op die gras saam met hom ‘n kak te vang? Ek bly in ‘n townhouse en my buurvrou sal beslis nie verstaan nie. Sy is ‘n kat mens.

Is daar dalk enige genetiese defekte of in geteelde gedrag wat hiervoor verantwoordelik kan wees? Is Pugs dalk oorspronklik geteel as kaksoekers of om ‘n wrok te koester teen gehurkte mense?

As Dokter my dalk spoedig kan laat weet wat die moontlike oorsaak kan wees en of ander luisteraars soortgelyke klagtes het sal ek dit waardeer.

By voorbaat dank,

Worsbeursie.