Ek praat nou van die seksvideo waarin Joost na bewering verskyn. Hy sê dit is nie hy in die video nie. Hy sê ook “My hart is by die Here.”

Ek het nog nie die video gesien nie, en Rapport is omtrent so geloofwaardig soos ‘n tweede-handse karverkoper met dobbelskuld, so dit is dalk regtig nie hy nie.

Ek hoop so vir Joost, want hierdie gaan groot kak wees.

Ek het nou klaar in die kommentaar op van die artikels ‘n patroon begin bespeur. “Is dit nou wat Christene doen?” “Ja jong, tipies, Jimmy Swaggart se hart was ook by die Here”. Weereens kom dit vir my neer op ‘n kwessie van kak advertensie. As jy iemand gaan adverteer, hetsy dit Afrikaners, Christene, Gays of Pottebakkers is, MOET jy besef dat mense wat nie van Pottebakkers hou nie, elke foutjie wat jy maak, en elke lyntjie ‘coke’ wat jy snuif teen jou EN teen Pottebakkers gaan hou.

Jy moet of stillerig wees oor die feit dat jy ‘n pottebakker is, of as jy die windgat, soek-die-kollig tipe pottebakker gaan wees met ‘n vrou wat in elke tweede Sarie en Rooi-Rose verskyn, moet jy doodseker maak jy is fokken onberispelik. Hoe meer windgat jy oor die hele pottebakker ding is, hoe meer skade gaan jy onskuldige pottebakkers aandoen die dag wat al jou kak op die lappe kom.

Ek wens die Blou Bulle wil ophou om kruisies met hulle vingers in die lug, op hul harte en op die veld te maak, op hul kniee neerslaan en gebede opstuur na elke drie, strafskop en vryskop. Dit is hulle absolute reg, en ek sou absoluut bebliksemd wees as hulle ooit ‘n reël probeer maak daaroor, maar rugbyspelers is oor die algemeen stout fokkers met min verantwoordelikheid en ‘n klein besef van nagevolge, nie die ideale Christelike ‘Public Relations’ mense nie.

My pa het gesê julle moet met my speel! Hy sê ek kan speel en as hy so sê dan is dit so want my pa is ‘n held. As julle nie saam met my wil speel of eet of stort nie dan gan ek OP MY TRUI KOTS! WHAAAAAAAH!

I don’t hate Afrikaners, says angry Watson.

Luke se pa se opinie.

“Ek wil opgooi op my trui”.

Ek het gister weer ‘n koerant opskrif gelees oor iemand wat kla oor die Bokke wat te ‘wit’ is. Wat van boeremusiek orkeste? Gaan kyk net hier, nie een swart gesig in sig nie.

Net soos rugby is boeremusiek, veral gedurende die apartheidsjare, van ons jong swart bevolking weerhou. Terwyl jong wit seuns gedroom het daarvan om voor tot 80 mense te kan optree met a banjo of konsertina op die skoot, moes swart seuns in hulle kamers vas staar teen plakkate van Mzekezeke, Arthur, en Mandoza. Hulle het nie eers geweet van selfs hoofstroom groepe soos Klipwerf nie.

Sommige mense sal argumenteer dat dit ‘n baie lang tyd sal neem vir swart boeremusiek kunstenaars om deur te syfer na die hoogste vlak van die genre omdat swart mense nie belangstel in boeremusiek nie, en
dat selfs al sou daar een deur dring en dit ‘groot’ maak, dit nie noodwendig ander swart kunstenaars sou weg lok van kwaito, jazz en gospel nie, want, soos tevore genoem is, swart mense luister nie na boeremusiek nie.

Hoewel die argument sy meriete het, dink ek nie ons moet ons laat lei deur feite, statistieke en logiese denke nie. Ek dink ons moet die ding emosioneel benader, en met soveel politiese korrektheid dat ons daarvan begin naar word. In daardie emosionele, onlogiese luim sal dit dan vir ons duidelik word dat dit in nasionale belang is dat meer en meer swart musikante dit tot op die hoogste vlak van boeremusiek maak, tot daar rofweg vier keer meer swart mense boeremusiek speel as wat eintlik daarna luister.

Dan sal ons met ‘n skoon gewete kan luister na ‘Die Baber Vastrap’, die ‘Sannie de Nekker Setees’ en die ‘Jannie de Waal Wals’ soos gespeel deur Sipho Gumede en die Velleklappers of dalk Simon Mametse en die Roftossers. Ek kan nie wag nie.

In die Blou Bulle, Sharks game het die TV ref 30 minute geneem om ‘n verskeidenheid onnodige beslissings te maak. Nou’s almal kwaad vir die TV ref, of vir die skeidsregter.

Ek vermoed die spelers het agter gekom dat Fortuin enige stront na die TMO verwys en begin om kak op te maak sodat hulle so bietjie kan asem skep. “Haai ref, daai Albert van den Berg het in die lynstaan vir my sy voël gewys en gesê ‘Jy is volgende pellie’, met so gemene kyk in sy oë, kan jy nie gou check met die tv ref nie?”.

Hulle het altesaam 30 minute se ekstra rustyd by gekry! Moenie vir my sê rugby spelers is dom nie hoor. Hulle het gou agtergekom dat Fortuin vir die TMO sal vra of hy sy sokkies mag optrek as hy kon, en ordentlik misbruik gemaak van die situasie.

Gaan kyk vinnig want hulle gaan dit afhaal. Hulle moenie, want dit is waar, maar hulle gaan.

Wikipedia, en ons weet als in Wikipedia is waar, sê ook dat Stuart Dickinson blind en bevooroordeeld is.

Ons het dit al lank geweet maar nou kan ons dit uit ‘n ensiklopedie aanhaal.